8
1a Dane Saulus puniki setuju indik dane Stepanus kapademang.
Krama Druen Sang Hyang Yesuse Kasiksa
1b-3 Salanturnyane,
wenten anak sane bakti kapining Sang Hyang Pengardi,
mendem sawan dane Stepanus tur nangisin dane antuk manah sane kalintang sungsut.
Ngawit galahe punika,
para kramane sane wenten ring Kota Yerusalem keras pisan kasiksa.
Dane Saulus setata mautsaha ngamademang kramane sami sane dados druen Sang Hyang Yesuse.
Tur dane ngranjing ka sebilang umah jagi maid pesu para kramane tur nyerahang ipun sami mangda kakrangkeng ring buine.
Punika mawinan akeh para kramane irika rarud maideh-idehan ka Wawidangan Yudea lan Samaria.
Nanging para utusan Sang Hyang Yesuse kari ring Kota Yerusalem.
Para Utusane Midartayang Orti Rahayu ring Wawidangan Yudea lan Samaria
8:4—12:25
Dane Pilipus ring Wawidangan Samaria
4 Para krama sane sambrag punika luas maideh-idehan saha ngortiang Orti Rahayune.
5 Dane Pilipusa luas ka salah tunggal kota ring Wawidangan Samaria.
Irika dane ngortiang indik Sang Prabu Sane Kajanjiang olih Sang Hyang Pengardi.
6 Anake akeh mirengang dane Pilipus tur nyaksiang dane nglaksanayang paindikan-paindikan sane ngangobin.
Punika mawinan anake akeh punika seken-seken nerima pengajahan dane Pilipuse.
7 Para buta kalane makaikan antuk suara keras tatkala pesu saking anake akeh sane karangsukan,
tur akeh anak lumpuh lan perot sane kasegerin.
8 Punika mawinan anake ring kotane punika kalintang masukarena.
9 Ring kotane punika,
wenten adiri anak sane mapesengan Simon.
Ipun sampun sue dados tukang sihir ring kotane punika lan ngranayang anak Samariane angob.
Ipun ngaku deweknyane anak sakti.
10 Makasami anake ring kotane punika,
krama tiwas wiadin sugih,
seken-seken ngugu sekancan raos I Simone.
Ipun sami mabaos sapuniki,
“Anake puniki nenten tios kakuatan Sang Hyang Pengardi,
sane lumrah kasambat ‘Kakuatan Ageng.’”
11 Anake sami ring kotane punika nugtug I Simon krana sampun sue I Simon ngulangunin manah anake irika malantaran kasaktian ipune.
12 Nanging,
mangkin wargane irika pracaya ring dane Pilipus sane ngortiang Orti Rahayu indik Sang Hyang Pengardi jagi mamrentah dados Raja.
Samaliha dane ngortiang indik Sang Hyang Yesus dados Prabu sane kajanjiang olih Sang Hyang Pengardi.
Anak lanang wiadin istri nyerahang raga mangda kalukat dados tanda ipun ngiring Sang Hyang Yesus.
13 Kenten pada,
I Simon taler pracaya ring Sang Hyang Yesus.
Sasampune I Simon kalukat,
ipun setata ngiring dane Pilipus.
Irika I Simon ngon pisan nyaksiang sekancan praciri lan paindikan sane ngangobin.
14 Ritatkala para utusan Sang Hyang Yesus ring Kota Yerusalem mirengin indik anak Samariane sampun pracaya pengajahan Sang Hyang Pengardi,
irika raris dane Petrus sareng dane Yohanes kautus mrika.
15 Sasampune dane sareng kalih rauh irika,
dane nunas ica mangda anak Samariane nerima Roh Sang Hyang Pengardi
16 krana Roh punika dereng tedun ring ipun sami.
Ipun wantah kalukat nganggen parab Sang Hyang Yesus kamanten.
17 Raris dane Petrus sareng dane Yohanes ngenahang tangan danene ring duur sirah anake irika.
Irika ipun sami nerima Roh Sang Hyang Pengardi.
18 Duk punika,
I Simon nyingakin Roh Sang Hyang Pengardi kapicayang malantaran para utusane ngenahang tangannyane ring sirah anake irika.
Raris I Simon meled ngaturang jinah ring dane Petrus sareng dane Yohanes.
19 I Simon mabaos sapuniki,
“Icen ja tiang taler kuasane punika,
mangda ritatkala tiang ngenahang tangan ring duur sirah anake lianan,
ipun prasida nerima Roh Sang Hyang Pengardine.”
20 Nanging dane Petrus mabaos sapuniki,
“Sengkala ja ragane miwah jinah ragane!
Krana ragane ngaden pican Sang Hyang Pengardine prasida katumbas nganggen jinah.
21 Ragane nenten madue hak sareng-sareng tiang sami ngaturang ayah krana manah ragane nenten patut ring ajeng Sang Hyang Pengardi.
22 Sane mangkin,
masalin ja saking manah sane jaat punika tur nunas ica ja kapining Sang Hyang Pengardi mangda Ida ngampurayang papineh jaat ragane punika!
23 Tiang uning ragane kalintang iri ati tur kakuasain olih dosa.”
24 Raris I Simon masaur sapuniki,
“Tunas icayang ja titiang mangda makasami sane baosang jerone nenten mamargi ring dewek titiange.”
25 Sasampune dane Petrus sareng dane Yohanes ngicen kasaksian lan midartayang pengajahan Sang Ratu Agung,
dane raris mawali ka Kota Yerusalem.
Ring pamargin danene,
irika dane ngortiang Orti Rahayu kapining anake akeh ring desa-desa Samaria.
Pengede Etiopiane sane Kalukat
26 Ring dina anu,
malekat Sang Hyang Pengardi masabda ring dane Pilipus sapuniki,
“Dabdabang ja tur luas nglodang ka jalane nuunang uli Kota Yerusalem nuju ka Kota Gasa.”
Margine punika margi sane suung.
27 Irika dane Pilipus mataki-taki jagi mamargi nglodang.
Ring margine punika,
wenten pengede Etiopiane sedek budal ka negerinnyane.
Ipun dados penanggung jawab kasugihan ratu Kandake saking Negeri Etiopiane.
Ipun sampun ka Yerusalem mabakti ring Sang Hyang Pengardi,
28 tur sane mangkin sedek budal negakin kreta.
Irika ipun sedek ngwacen cakepan dane Yesaya,
inggih punika sinoman Sang Hyang Pengardi idumun.
29 Raris Roh Sang Hyang Pengardi masabda ring dane Pilipus,
“Kemu ja!
Paekin kretane ento.”
30 Dane Pilipus raris mrika tur mirengin pengedene punika sedek ngwacen cakepan dane Yesaya punika.
Raris dane Pilipus nakenang sapuniki,
“Jero,
ngresepke jero paindikan sane kawacen?”
31 Pengedene punika masaur sapuniki,
“Punapike carane tiang ngresepang?
Nenten wenten anak sane nuntun tiang.”
Raris ipun nunas mangdane dane Pilipus munggah tur sareng malinggih ring kretane.
32 Lengkarane sane kawacen duk punika sekadi puniki,
“Ipun sekadi biri-birib sane kabakta jagi katampah,
Lan sekadi panak biri-biri ipun mendep ritatkala bulunnyane jagi kacukur.
Kenten pada abukuke ipun nenten mabaos.
33 Ipun kanista lan keni ukuman sane nenten adil.
Sirake sane jagi nyeritayang indik sentanan ipune?
Nenten ja wenten,
krana jiwatman ipun kaambil saking jagate.” Yesaya 53:7,8.
34 Raris pengede punika mabaos ring dane Pilipus sapuniki,
“Tiang mataken kapining jerone,
indik sirake trawangan sane kabaosang punika?
Indik dewek dane Yesaya praragan utawi indik anak lianan?”
35 Ngawit saking lengkarane punika,
dane Pilipus nyeritayang Orti Rahayu indik Sang Hyang Yesus ring pengedene punika.
36 Ring tengahin pamargi,
ipun rauh ring genah sane madaging toya.
Tur pengedene punika mataken sapuniki,
“Cingak ja!
Irika wenten toya!
Dadoske tiang kalukat?
Duaning mangkin tiang sampun siaga.”
37 [Dane Pilipus raris masaur sapuniki,
“Yening jerone sujati pracaya ring Sang Hyang Yesus,
jerone dados kalukat.”
Pengede punika nyaurin sapuniki,
“Tiang pracaya Sang Hyang Yesus Kristus wantah Putran Sang Hyang Pengardi.”]c
38 Raris pengede punika mrentahang kusir kretane mangda mareren.
Sasampune dane Pilipus sareng pengedene tedun saking kretane,
ipun sareng kalih ngranjing ka toyane,
tur pengedene punika kalukat olih dane Pilipus.
39 Ritatkala ipun medal saking toyane,
jeg saget Roh Sang Hyang Pengardi ngambil dane Pilipus saking genahe punika,
tur pengedene nenten nyingakin dane Pilipus malih.
Raris pengedene punika nglanturang pamarginnyane antuk manah sane girang.
40 Jeg saget dane Pilipus sampun wenten ring Kota Asdod sane adoh saking genah malukat punika.
Dane mamargi ngliwatin wawidangan punika nyeritayang Orti Rahayune ring saluirin kota kantos rauh ring Kota Kaisarea.